މާޅޮސްމަޑުލު ދެކުނުބުރީ ދަރަވަންދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ފަރާތުން ރަށުގެ އަންހެން ކަނބަލުންނަށް އަމާޒުކޮށްގެން ކުރިއަށް ގެންދިޔަ ޕޭސްޓްރީ ކޯސް ކާމިޔާބުކަމާއެކު ނިންމާލައިފިއެވެ.
މި ކޯހުގައި މިރަށުގެ 15 އަންހެން ކަނބަލުން ބައިވެރިވެފައިވެއެވެ. 2025 ފެބުރުވަރީ 23 އިން 27 އަށް ކުރިއަށް ގެންދެވުނު މި ކޯހުގައި ޕޭސްޓްރީގެ އެކި ވައްތަރުތައް ތައްޔާރުކުރަން ދަސްކޮށްދީފައިވެއެވެ. މި ކޯހުގެ ކުލާސްތައް ނަގާދީފައިވަނީ ފެސިލިޓޭޓަރ އެއްގެ ގޮތުގައި ކޯސް ހިންގައިދިނުމަށް ވަޑައިގެންނެވި އަލްފާޟިލާ މަރްޔަމް ނާޝިދާއެވެ.
މި ކޯހުގެ ސަބަބުން ގިނަ އަންހެން ކަނބަލުންނަށް ޕޭސްޓްރީ ހެދުމުގެ އަމަލީ ތަޖުރިބާ ލިބި، އެކަމުގެ ސަބަބުން ގޭގައި ތިބެގެން އާމްދަނީ ހޯދޭނެ މަގެއް ފަހިވެގެން ދާނެކަމަށް އުއްމީދުކުރެވެއެވެ.