25 އޮކްޓޯބަރު 2025
ކުރިޔަށް އޮތް ފަސް އަހަރުދުގެ ތެރޭގައި ތަންފީޒުކުރާ ދަރަވަންދޫގެ ސްޓްރެޓީޖިކް ޕްލޭނުގައިވާ، ފަތުރުވެރިކަމާބެހޭ ލަނޑުދަޑިތައް ހާސިލުކުރުމަށާއި، ފަތުރުވެރިންގެ މެދުގައި މަޤުބޫލު މަންޒިލަކަށް ދަރަވަންދޫ ހެދުމަށްޓަކައި ‘ދަރަވަންދުއަށް ޒިޔާރަތްކުރުމުގެ އަހަރު 2025’ އިފްތިތާޙު ކުރުމަށް ބާއްވާ ޚާއްޞަ ޖަލްސާ މިރޭ ދަރަވަންދޫގައި ބާއްވައިފިއެވެ.
މި ޙަފްލާގައި ދަރަވަންދުއަށް ޒިޔާރަތްކުރުމުގެ އަހަރު 2025 ގެ ލޯގޯއާއި ތީމް ލަވަ ތަޢާރަފުކޮށް، ދަރަވަންދުއަށް ޒިޔާރަތްކުރުމުގެ އަހަރަށް ކަނޑައެޅި އެމްބެސެޑަރުން އާންމުކުރެވުނެވެ. އަދި މިއަހަރާބެހޭގޮތުންނާއި، ދަރަވަންދުއާބެހޭ ގޮތުންނާއި، ފާހަގަކޮށްލެވޭނޭ ފަދަ ގޮތަކަށް މިފަދަ އަހަރެއް ފާހަގަކުރުމާބެހޭގޮތުން އެކި ފުރައިގެ އެކި ގިންތީގެ މީހުން ފާޅުކޮށްފައިވާ ޝުޢޫރުތައް އިއްވުންވެސް މި ހަފުލާގައި އޮތެވެ. ޚާއްޞަ ގޮތެއްގައި، ދަރަވަންދުއަށް 8 ފަހަރު ޒިޔާރަތްކޮށްފައިވާ، އޮސްޓްރޭލިޔާގެ މިސް އެމެންޑާއާއި، އެމެރިކާގެ މިސް ކިމް، ދަރަވަންދުއާބެހޭގޮތުން ފާޅުކޮށްފައިވާ ހަނދާނުން ފޮހެލަން ދަތި ތަޖުރިބާތަކާއި އުފާވެރި އިޙްސާތަކާބެހޭ ޝުޢުރުތައް ހާމަކޮށްދީފައިވާ ވީޑިއޯއެއްވެސް މި ޙަފްލާގައި ޢާންމުކުރެވުނެވެ.
ރަށުގެ ރައްޔިތުންނާއި ފަތުރުވެރިންނާއި ޚާއްޞަ މެހްމާނުންނަށް ދަޢުވަތު އަރުވައިގެން ބޭއްވި މި ޚާއްޞަ ހަފުލާގައި، މަރްޙަބާ ދެންނެވީ ދަރަވަންދޫ ކައުންސިލްގެ ރައީސް އަލްފާޟިލް ޢަލީ ސާމިޙްއެވެ. ދަރަވަންދުއަށް ޒިޔާރަތްކުރުމުގެ އަހަރު 2025 ގެ ފަންނީ ކޮމިޓީގެ ފަރާތުން ވާހަކަފުޅު ދެއްކެވީ، ފަތުރުވެރިކަމުގެ ދާއިރާއަށް މީހުން ބިނާކުރުމުގައި މަޤްބޫލުކަން ހޯއްދަވާފައިވާ މޯޓިވޭޝަނަލް ސްޕީކަރ ޙުސައިން ޢަފީފުއެވެ.
މި ޚާއްޞަ އުފާވެރި ޙަފްލާ ނިންމާލީ، މުޅި ރާއްޖޭގެ އެންމެހައި ރައްޔިތުންނަށާއި، ދުނިޔޭގެ ހުރިހާ ކަންކޮޅުތަކެއްގައި ތިބި ފަތުރުވެރިންނަށް އޮތްކަން ހާމަކޮށްދިނުމާއެކު، އެހުރިހާ ފަރާތްތަކަށް ދަޢުވަތު އަރުވަމުން، ބޮޑުބެރުގެ ފޯރިގަދަ ލަވަތަކާއެކުގައެވެ.
ދަރަވަންދުއަށް ޒިޔާރަތްކުރުމުގެ އަހަރެއް ފާހަގަކުރަން ދަރަވަންދޫ ކައުންސިލުން ނިންމީ، ދަރަވަންދުއަކީ، ސާފު މޫދުގައި ރީތި ނަލަ މުރަކަތަކުން ޖަރީވެފައިވާ، ބަލައި ފޫހިނުވާހައި ރީތި މޫދު މަޑިތަކާއި، މާސިންގާ ފެހުރިއްސާއި، ވެލާ ކަހަނބުން ފުރިފައިވާ އަދި ޔުނެސްކޯގެ ބައޮސްފިއާ ރިޒާވްގައި ހިމަނާފައިވާ މަޝްހޫރު ހަނިފަރުގެ ކައިރީގައި އޮތް ރަށަކަށްވެފައި، ޤުދްރަތީ މި ރީތިކަމާއި، މުއްސަނދިކަމާއި ނަލަކަމުގެ ބޭނުން ހެޔޮގައިހިފައިގެން ދަރަވަންދޫގެ ވިޔަފާރި ކުރިއަރުވައި، ރައްޔިތުންގެ ކިބައިގައި ޒަމާނުއްސުރެ އަށަގެންފައިވާ މެހްމާނީދާރީ އަދާކުރުމުގެ ރޫޙު އާލާކޮށް ދިރުވައި، މުޅި ރަށަށް ތަނަވަސްކަމާއި ތިޔާގިކަން ހޯދުމުގެ ގޮތުންނާއި ރާއްޖޭގެ ފަތުރުވެރިކަން ކުރިއެރުވުމުގެ ގޮތުންނެވެ.
ދަރަވަންދޫ ކައުންސިލުން، ދަރަވަންދުއަށް ޒިޔާރަތްކުރުމުގެ އަހަރު ފާހަގަކުރަމުންދަނީ، ވަރަށް ގިނަ ފަރާތްތަކެއްގެ ބައިވެރިކޮށްގެން، ވަރަށްގިނަ ފަރާތްތަކެއްގެ އެއްބާރުލުމާއެކުގައެވެ. ޚާއްޞަ ގޮތެއްގައި ދަރަވަންދޫގެ ފަތުރުވެރިކަން ކުރިއެރުވުމަށް ފަށާފައިވާ މި މަސައްކަތަށް ވަރަށް ގިނަ ފަރާތްތަކުން ތަރުޙީބު ދެއްވައި، ސްޕޮންސަރ ދެއްވާފައިވާކަން ކައުންސިލުން ޝުކުރުވެރިކަމާއެކު ފާހަގަކުރައްވައެވެ.
